तस्विरः रश्मिता दर्लामी
लन्डन । एक्सेस फाइनान्सियल सर्भिसेज यूकेले गत १४ फेब्रुअरीमा प्लमस्टिडमा मोर्गेज र कर सम्वन्धि निशुल्क परामर्श दिएको छ । प्लमस्टिडस्थित गेसो हलमा खचाखच दर्शकबीच सेमिनार भएको हो । नेपाली समुदायमा यस क्षेत्र समेटेर दिइएको निशुल्क परामर्श पहिलो अभ्यास हो ।
५ जना नेपाली तथा बेलायती वीज्ञहरुले मोर्गेज, रिमोर्गेज, वील एण्ड स्टेट, कर, घर खरिद विक्री र यसमा सोलिसिटरहरुको भूमिका, विजनेश प्लान आदिबारे परामर्श दिएका हुन् ।
देवी आलेको संयोजनमा भएको उक्त सेमिनारमा सन्दीप एन शाहले वील र स्टेट प्लानिङको महत्व, समिरनाथ प्याकुरेलले प्रोपर्टीमा करको असर र नयां नियम, हितेश बी शाहले घर खरिद प्रक्रिया र यसमा सोलिसिटरको भूमिका, र मिन दर्लामीले मोर्गेज, रिमोर्गेज, बाइ टु लेट र इन्सुरेन्स सम्वन्धमा परामर्श दिए ।
एक्सेसका सञ्चालक तथा इन्डिपेन्डेन्ट फाइनान्सियल एडभाइजर मिन दर्लामीले प्लमस्टिडको सहभागिता उल्लेख्य भएको जनाउंदै यसबाट धेरै लाभान्वित भएको बताए । उनले आगामी मार्च ६ तारिखका दिन आसफोर्डको वुमन्स इन्सटिच्युट हलमा समेत यस्तै परामर्श कार्यक्रम तय गरिएको जनाए ।
सेमिनारमा एक्सेस आवद्ध रमेश सराङकोटी र कुमार गुरुङले पनि संयोजनकारी भूमिका निर्वाह गरेका थिए ।
चार वर्षअघि स्थापित एक्सेस फाइनान्सियल सर्भिसेज यूकेले इन्भेस्टमेन्ट, पेन्सन, मोर्गेज, इन्सुरेन्स, स्टेट प्लानिङ लगायतका क्षेत्रमा सेवा उपलब्ध गराउंदै आएको छ ।
उक्त कम्पनीले सन् २०१६ भित्र बेलायतका विभिन्न ६ शहरमा नेपाली समुदायका लागि यस्तो परामर्श दिने लक्ष्य राखेको छ भने गत वर्ष फार्नबोरो र साउथ ह्यारोमा पनि यस्तै खालको कार्यक्रम गरेको थियो ।
