द्वन्द्वपीडित वालवालिकाका लागि च्यारिटी गर्दै महिला फोरम

लन्डन । द्वन्द्वपीडित वालवालिकाको सहयोगका लागि बेलायतमा भव्य च्यारिटी कार्यक्रम हुने भएको छ । अन्तर्राष्ट्रिय नारी दिवसको अवसरमा गैर आवासिय नेपाली संघ, बेलायत महिला फोरमले यही मार्च ५ तारिख शनिवार अल्डरसटको किंग्स् सेन्टरमा च्यारिटी गर्न लागेको हो ।

कार्यक्रमबाट संकलित रकम सर्लाहीको हरिवन घर्कौलीस्थित चेतना समूह नेपालद्वारा सञ्चालित द्वन्द्वपीडित अनाथ वालगृहलाई प्रदान गरिने फोरमकी संयोजक सुशीला राईले जानकारी दिइन् ।

आश्रममा चालिस भन्दा बढि द्वन्द्वपीडित वालवालिका आश्रित छन् । राईकै नेतृत्वमा प्रवासी नेपाली मञ्चले नारी दिवस कार्यक्रम आयोजना गरि चितवनका चेपांगहरुलाई सहयोग समेत गरिएको थियो ।

अन्तर्राष्ट्रिय महिला दिवसको उपलक्ष्यमा हिमाल पहाड तराईको एउटै नारा संवृद्ध समाज निर्माण महिलाको अभिभारा भन्ने नाराका साथ फोरम सामाजिक कार्यमा जुटेको हो । एनआरएन महिला फोरमले यसअघि विकट जिल्ला जुम्लाको मितेरी गाविसमा निर्माणार्थ प्रसुती केन्द्रका लागि २० लाख रुपैयां भन्दा बढि रकम सहयोग गरिसकेको छ । फोरमले असहाय महिला तथा वालवालिकाको क्षेत्रमा काम गर्दै आएको छ । फोरमले हरेक वर्ष नारी दिवसका अवसरमा समाजिक कार्य पनि आयोजना गर्दै आएको छ ।