लन्डन फिल्म फेस्टिभलमा छानियो मेघा

लन्डन । महिला निर्देशक सम्झना उप्रेती रौनियारले निर्देशन गरेको नेपाली फिल्म ‘मेघा’ १८ औं लन्डन एसियन फिल्म फेस्टिभलमा छनोट भएको छ । टङस् अन फायरले आगामी ४ देखि १३ मार्च, २०१६ सम्म आयोजना गर्न लागेको महोत्सवमा मेघा छानिएको हो । उक्त सिनेमा आगामी ६ मार्च अपरान्ह साढे चार बजे वाटरम्यान्स्मा प्रदर्शन गरिने कार्यकारी निर्माता विकास रौनियारले जनाएका छन् ।
निर्माता निर्देशक, कलाकार, शुभेच्छुक र दर्शकहरु उल्लेख्य सहभागी हुने उक्त वार्षिक चलचित्र महोत्सवमा दक्षिण एसियाली फिल्म प्रदर्शन, भिज्यूअल आर्ट एक्जिविसन, फिल्म सम्वन्धि विचार गोष्ठी, वर्कसप, कलाकार र निर्माता 
निर्देशकहरुको अन्तर्वार्ता आदि प्रस्तुत गरिनेछ ।

दुई वर्ष अघि सार्वजनिक मेघामा नम्रता श्रेष्ठ, रेमनदास श्रेष्ठ, सिद्धार्थ कोइराला, भिन्तुना जोशी लगायत कलाकारको अभिनय छ ।
प्रेम कथामा केन्द्रित यस फिल्ममा इसान (रेमनदास श्रेष्ठ) संग विवाह भइसकेकी पेशेवर एक युवती मेघा (नम्रता श्रेष्ठ) गौरव (सिद्धार्थ कोइराला) संग प्रेममा डुबेको कहानी छ । फिल्मले शहरीया व्यस्त जीवनशैलीले वैवाहिक जीवनमा पार्ने प्रभाव समेत उजागर गरेको छ ।
गोपाल योन्जनको संगीत रहेका गीतहरु जीवनको हरेक मोडमा, मेरो जोवन 
लैजाऊ, यति चोखो यति मिठो दिउंला तिम्लाई मायां, तिमी देऊ या नदेऊ, काली पनि देखें मैले… आदि समावेश भएको २ घण्टा ११ मिनेट लामो उक्त फिल्म सबस्ता इन्टरटेनमेन्ट प्रा. लि. ले निर्माण गरेको हो ।