लन्डन । नेपाली समुदायसंग निकट रहेका एकजना बेलायती सांसद वीरेन्द्र शर्माले नेपालका पूर्व प्रधानमन्त्री एवं कांग्रेस सभापति सुशील कोइरालाको निधनप्रति दुःख व्यक्त गरेका छन् । ब्रिटेनको सर्वदलीय संसदीय समितिका नेपाल अध्यक्ष समेत रहेका सांसद शर्माले आज बुधवार एक शोक वक्तव्य जारी गर्दै गहिरो दुःख व्यक्त गरेका हुन् ।
कोइराला नेपाली राजनीतिमा एक महान र दुर्दर्शी व्यक्तित्व भएको जनाउंदै शर्माले कोइरालाकै योगदान स्वरुप नेपालले नयां संविधान पाएको बताएका छन् ।
कोइरालासंग कयौं पटक भेट भएको स्मरण गर्दै शर्माको वक्तव्यमा कोइरालाको निधनपछि नेपालले एकजना महान नेता गुमाएको उल्लेख छ । शर्माले वक्तव्यमा कोइरालाको राजनीतिक अन्तरदृष्टि र वुद्धि आफूले सधैं सम्झिरहने पनि बताएका छन् ।
शर्माले भूपू गोर्खा र नेपाली समुदायसंग निकट रहेर आफ्नो तर्फबाट सक्दो सहयोग गर्दै आएका छन् ।
लोभ लालच र भ्रष्ट आचरणमा कहिल्यै नमुछिएका नेता कोइरालाको आजै पशुपति आर्यघाटमा राजकीय सम्मानका साथ अन्त्येष्टी गरिएको छ । अन्त्येष्टीमा हजारौंको सहभागिता थियो ।
