कोइरालाको श्रद्धाञ्जलि सभामा एक दर्जनमात्र सहभागी

लन्डन । दिवंगत पूर्व प्रधानमन्त्री एवं नेपाली कांग्रेसका सभापति सुशील कोइरालाप्रति श्रद्धाञ्जलि अर्पण गर्न आयोजित एक कार्यक्रममा सहभागी संख्या एक दर्जन हाराहारीमात्र रह्यो ।

पशुपति आर्यघाटमा दशौं हजार सहभागी बीच राजकीय सम्मानका साथ कोइरालाको अन्त्येष्टी भइरहंदा लन्डनमा भने सहभागी नै भेटिएन ।

नेपाली जनसम्पर्क समिति, बेलायतको विज्ञान प्रसाईं समूहले शोक सभा गरेको थियो । जनसम्पर्क समितिमा फुट र छोटो सूचनाका कारण कार्यक्रममा सहभागी उल्लेख्य नरहेको विश्वास छ । बेलायतवासी नेपालीलाई राजनीतिप्रति उति चासो नरहेपनि कोइराला प्रजातन्त्रका लागि लडेका एकजना सादगी योद्धा थिए । उनको निधनमा संयुक्त राष्ट्रसंघसहित अन्तर्राष्ट्रिय समुदायले शोक व्यक्त गर्दै दक्षिण एसियाले एकजना शालिन नेता गुमाएको उल्लेख गरेको छ ।

ब्लु अर्किड रेष्टुरेन्टमा आयोजित कार्यक्रममा प्रसाईंसहित शान्तविनोद लामिछाने, विजन भट्ट, महेश दाहाल, चिरन्जिवी ढकाल, सरिता पौडेल, तारा पौडेल, एकराज नेम्वांगसहित गन्न सकिने उपस्थित थिए । सहभागीले स्वर्गीय कोइरालाप्रति श्रद्धाञ्जलि अर्पण गर्दै संविधान जारी गर्न रहेको उनको अतुलनीय योगदानको प्रशंसा गरे ।

यसैबीच, लोक गुरुङ सभापति रहेको जनसम्पर्क समितिले भने १३ औं पूण्यतिथीका दिन शोक सभा गर्ने भएको छ ।