कोइरालाको निधनले बेलायत दुःखी

लन्डन । नेपालका पूर्व प्रधानमन्त्री एवं नेपाली कांग्रेस सभापति सुशील कोइरालाको निधनमा बेलायतले दुःख व्यक्त गरेको छ ।

बेलायती विदेश राज्यमन्त्री ह्युगो स्वायरले कोइरालाको निधनले आफू दुःखी भएको बताएका छन् । स्वायरले एक शोक वक्तव्यमा मृतात्माको चीर शान्तिको कामना गर्दै देशको संविधान जारी गर्न कोइरालाले अतुलनीय भूमिका निर्वाह गरेको स्मरण इतिहासले गरिरहने पनि उल्लेख गरेका छन् ।

मंगलबार दिवंगत भएका कोइरालाको बुधवार राजकीय सम्मानका साथ पशुपति आर्यघाटमा अन्त्येष्टी गरिएको छ ।

यसैबीच, लन्डनस्थित नेपाली दूतावासले कोइरालाप्रति समवेदना प्रकट गर्न इच्छुकलाई बिहीबार र शुक्रवार दुई दिन शोक पुस्तिका राख्ने निर्णय गरेको छ ।