नेपाली नर्सहरुले गरे करिअर सेमिनार

 

लन्डन । बेलायतमा कार्यरत नेपाली नर्सहरुले अप्रिलदेखि लागू हुन लागेको नयां वाध्यकारी नियमको पूर्व सन्ध्यामा शनिवार एउटा सेमिनार आयोजना गरेका छन् । लन्डन नर्थहोल्टस्थित ब्लु अर्किड रेष्टुरेन्टमा सम्वन्धित क्षेत्रका वीज्ञ झिकाएर सेमिनार गरिएको हो । नर्स तथा मिडवाइफहरुको नियमक तथा लाइसेन्स दिने निकाय नर्सिङ एण्ड मिडवाइफ्री काउन्सिल (एनएमसी) ले रजिष्टर्ड नर्सहरुका लागि यही अप्रिलदेखि नयां नियम ल्याउंदैछ ।

नर्सहरुलाई अप टु डेट राख्न सहयोगी हुने ठानिएको उक्त सेमिनारमा नर्सिङ एण्ड मिडवाइफ्री काउन्सिल (एनएमसी) रिभ्यालिडेसन र रोयल कलेज अफ नर्सिङबारे क्रिस्टिन म्याकेन्जीले प्रवचन दिएकी थिइन् । त्यसैगरि, डिमेनसिया एण्ड मेमोरी क्लिनिक्स्बारे नेपलिज डक्टर्स एसोसिएसन यूकेका पूर्व अध्यक्ष डा. अरुणकुमार झा, मेडिसिन अप्टिमाइजेसनबारे फार्मेसिस्ट रमेश फुंयाल र क्यान्सरबारे नर्सिङ एसोसिएसनकी पूर्व अध्यक्ष अजिता सिम्खडाले प्रकाश पारेका थिए ।

उक्त कार्यक्रममा नर्सिङका विभिन्न पक्षबारे समेत प्रश्नोत्तर भएको थियो । सहभागी नर्सहरुले आफ्नो करिअर विकासका लागि सेमिनार फलदायी भएको टिप्पणी गरेका थिए ।

एनएमसीले अप्रिलदेखि नर्स र मिडवाइफहरुलाई प्रत्येक तीन वर्षमा रिभ्यालिडेसन 
(योग्य भए नभएको जांच्ने) गर्दा थप नियम ल्याउन लागेको छ । यसअघि रिभ्यालिडेसनमा ४ सय ५० घण्टा प्राक्टिस आवरमात्र भरेर पठाए हुनेमा अब त्यो सहित ३५ घण्टा प्रोफेशनल डेभलप्मेन्ट कोर्स (सिपिडी) अनिवार्य गरेको हुनुपर्ने, आफ्नो दक्षता वृद्धि झल्कने ५ वटा अनुभव (रिफ्लेक्टिभ अकाउन्ट) र काम सम्वन्धि विरामी, विरामीका आफन्त, समकक्षी, व्यवस्थापक आदिसंगको ५ वटा प्रतिक्रिया पेश गर्न अनिवार्य गराइंदैछ ।

नेपलिज नर्सिङ एसोसिएसन यूकेकी अध्यक्ष सुशिला कार्कीले नयां नियमले आफू जस्ता अन्य कयौं नेपाली नर्समा अन्यौल र चिन्तित बनाएकाले त्यसको निराकरणका लागि सेमिनार गरिएको जनाइन् । नयां नियम केही चिन्ताको विषय भएपनि यसले नर्सहरुलाई करिअरमा अप टु डेट हुन सघाउने कार्कीको धारणा थियो ।

सेमिनारमा उपाध्यक्ष प्रसुना कंडेल, महासचिव विनोदविकास सिम्खडा, कोषाध्यक्ष रश्मिता दर्लामी, पूर्व अध्यक्ष बासु लामिछाने लगायतले अग्रणी भूमिका निर्वाह गरेका थिए ।

उक्त कार्यक्रममा दिवा भोज प्रायोजन भिक्टोरिया केयर सेन्टरका महाप्रवन्धक बासु लामिछानेले गरेका थिए ।

तस्विरहरुः शिव भण्डारी