एनआरएनए यूकेको कमल थापासंग हुने अन्तरक्रिया रद्द

लन्डन । गैर आवासीय नेपाली संघ, बेलायत (एनआरएनए यूके) ले नेपालका उपप्रधान एवं परराष्ट्रमन्त्री कमल थापासंग १७ तारिखका दिन गर्ने भनिएको अन्तरक्रिया कार्यक्रम रद्द भएको छ । एनआरएनए यूके पदाधिकारी र नेपाली दूतावासबीच पर्याप्त समन्वय नहुंदा कार्यक्रम रद्द गर्नुपरेको हो ।

संघका महासचिव विजय विक्रम लिङ्देन र प्रवक्ता खुशी लिम्बुले गत ५ डिसेम्बरमा स्थानीय पत्रकारहरुलाई लन्डनस्थित गोल्डेनसीप रेष्टुरेन्टमा थापासंग अन्तरक्रिया हुने जनाउंदै निमन्त्रणा गरेका थिए । साथै भाइबर ग्रुपमा पनि सबैलाई कार्यक्रममा आउन निम्तो गरिएको थियो ।

तर, उपप्रधानमन्त्री जस्तो व्यक्तित्व सहभागी हुने कार्यक्रम एउटा सामान्य रेष्टुरेन्टमा गर्ने तय भएपछि व्यापक आलोचना भएको थियो । नेपलिज नर्सिङ एसोसिएसन यूकेकी अध्यक्ष सुशिला कार्कीले उपप्रधानमन्त्री आउने कार्यक्रम रेष्टुरेन्टमा राख्ने प्रचार प्रसार गरिएपछि भाइबर ग्रुपमै विरोध जनाएकी थिइन् । उनले वीनेपालीसंग कुरा गर्दै एनआरएनए यूके जस्तो संस्थाले थापासंग एउटा सामान्य रेष्टुरेन्टमा कार्यक्रम गर्नु विडम्बना भएको जनाइन् । ‘हामी त्यत्ति गरिब त छैनौं नि रेष्टुरेन्टमा कार्यक्रम गर्न’, कार्कीले थपिन्, ‘इन्डियनहरु रेड कार्पेट राखेर ओटु एरिनामा कार्यक्रम गर्छन्, हामी चाहिं भट्टी खोज्दै हिंड्छौं’, उनको आक्रोश थियो । कार्कीले थापा देशकै एउटा उच्च तहमा भएको व्यक्तित्व भएकाले उनको उपस्थितिसंग देशको प्रतिष्ठा गांसिने पनि जनाइन् ।

 

कार्यवहाक राजदूत तेजबहादुर क्षेत्रीले १९ डिसेम्बरका दिन दूतावासमै कार्यक्रम हुन लागेको जनाउंदै थापाले अन्य कार्यक्रममा सहभागिता जनाउने कन्फर्म गरिनसकेको जनाए । उनले एनआरएनए यूकेको कार्यक्रमबारे आफूहरु अनभिज्ञ रहेको समेत जनाए ।

संघका अध्यक्ष मुछेत्र गुरुङले कार्यक्रम गर्ने छलफल भएपनि कन्फर्म भइनसकेको दावी गरे । महासचिव लिङ्देनले रेष्टुरेन्टमा कार्यक्रम गर्न लागिएकोबारे जिज्ञासा राख्दा यसप्रति विरोध आएपछि कार्यक्रमस्थलबारे पुनर्विचार गरिने बताएका थिए ।

कार्यक्रमको सट्टा एनआरएनए यूके प्रतिनिधिहरुले थापासंग बेग्लै भेट्ने तय भएको श्रोतको दावी छ ।

बेलायत नेपाल कुटनीतिक सम्वन्ध स्थापनाको २०० वर्षगांठका अवसरमा बेलायती परराष्ट्र मन्त्रालयमा १६ डिसेम्बर सांझ हुन लागेको विशेष समारोहमा भाग लिन थापा लन्डन आउने कार्यक्रम छ ।

थापाले बेलायती समकक्षीसंगको भेटमा भारतीय नाकाबन्दीबारे कुरा उठाउने अपेक्षा छ ।