च्यारिटी डिनरमा कार्यवहाक राजदूत तेजबहादुर क्षेत्री (बायां) र प्रिन्स माइकल अफ केन्ट । तस्विरः कुशल श्रेष्ठ
लन्डन । भूकम्प पीडित नेपाली वालवालिकाको सहयोगार्थ गत सोमबार सांझ दूतावासमा आयोजित च्यारिटी डिनरमा १४ हजार पाउण्ड संकलन भएको छ । संकलित रकम गोरखास्थित रान्चोक गाउंमा अवस्थित दुई स्कुलमा प्रेक्षालय निर्माण र १५ वटा भैंसी किन्न खर्च गरिने च्यारिटी डिनरका आयोजक डा. कपिल रिजालले जनाए । रिजालले च्यारिटी कार्यक्रममा सहभागी भएर सहयोग गर्ने सबै दाताप्रति आभार व्यक्त गरेका छन् ।
डा. रिजालले बेलायती च्यारिटी संस्था लिसा मे फाउण्डेशनको सहकार्यमा गोरखा रान्चोकका भूकम्प पीडित वालवालिकाको शिक्षा तथा स्वास्थ्य सेवाका लागि काम गरिरहेका छन् । फाउण्डेशनले भूकम्पपछि नेपालमा एक लाख २० हजार पाउण्ड खर्च गरिसकेको छ ।
च्यारिटी डिनरमा बेलायती महारानीका निकटतम नातेदार प्रिन्स माइकल अफ केन्ट जिसिभिओ सहित बेलायती न्याय मन्त्री माइकल गोभ, सांसद एवं पूर्व रक्षा राज्यमन्त्री जेराल्ड होवार्थ, सांसदहरु क्रिस डेभिस, मिसेल डोनेलन, एनआरएनए यूके अध्यक्ष मुछेत्र गुरुङ, पूर्व अध्यक्ष सूर्य गुरुङ, स्त्रीरोग विशेषज्ञ डा. भोला रिजाल लगायत सहभागी थिए ।
