अन्तिम समयमा गोलमेच सम्मेलन स्थगित

नेकपा–माओवादीसहितका राजनीतिक दललाई संविधान निर्माण प्रक्रियामा ल्याउन आयोजना गरिएको सर्वदलीय राजनीतिक सम्मेलन (गोलमेच सम्मेलन) अन्तिम समयमा स्थगित भएको छ ।

नेकपा–माओवादीको नेतृत्वमा रहेको ३३ दलीय मोर्चाले सम्मेलनमा सहभागी नहुने निर्णय गरेपछि मंगलबारका लागि तय गरिएको सम्मेलन प्रधानमन्त्री सुशील कोइरालाले स्थागित गरेका हुन् । यसअघि नेकपा–माओवादीको पदाधिकारी बैठक पार्टी कार्यालय वुद्धनगरमा बसेको थियो । वालुवाटारमा आयोजना गरिएको चार दलको बैठकमा कुरा नमिले पछि पदाधिकारी बैठक र त्यसपछि मोर्चाको बैठक बसेको थियो ।
‘शान्ति प्रक्रिया, महत्वपूर्ण राजनीतिक विषय र संविधानका अन्तरबस्तुको बारेमा छलफल नगर्ने प्रमुख दलको अडानको कारण सभाका जानुको औचित्य छैन भन्ने निर्णय मोर्चाले गरेको छ,’ नेकपा–माओवादीका उपाध्यक्ष सिपी गजुरेलले भने ।

नेकपा–माओवादीले नै संविधानको अन्तर्वस्तुमा सहभागी खोज्न सम्मेलन गर्नुपर्ने माग गर्दै आएको थियो । सरकारले ६६ वटा राजनीतिक दललाई सम्मेलनमा सहभागी हुन निमन्त्रण पठाएको थियो । जसअनुसार केही राजनीति दलका प्रतिनिधि सभा गर्ने स्थल नयाँ बानेश्वरस्थित संविधानसभा बैठकमा पुगिसकेका थिए ।
यसअघि नेपाली कांग्रेस, नेकपा एमाले, एकीकृत नेकपा माओवादी, नेकपा–माओवादीबीच सभाको कार्यविधि बारे सहमति भएको थियो । चार दलबाट ५–५ जना, अन्य दलका एक–एक जना प्रतिनिधि सहभागी रहने सहमति भएको थियो । एक सदस्यले बढीमा ५ मिनेट बोल्न पाउन व्यवस्था गरिएको थियो । शुरुमा दलहरुबीच सभा कहिले गर्ने विषयमै विवाद देखिएको थियो । प्रधानमन्त्री दुई साता लामो विदेश भ्रमण जाने भएपछि तयारीका लागि समय चाहिने माग गर्दै सभा पछि सार्न नेकपा–माओवादी तयार भएको थिरनयो । तर दलहरुबीच सभा छलफल गरिने विषयमा सहमति जुट्न सकेको थिएन ।
प्रधानमन्त्री कोइरालाले नेकपा–माओवादीका अध्यक्ष मोहन वैद्यलाई सभास्थलबाटै फोन गर्दै सहभागी नुहने निर्णयले आफूलाई दुःख लागेको बताएका थिए ।
यसअघि संविधानसभा चौथो ठूलो दल राप्रपा नेपालले सभाको औचित्य नभएको भन्दै बहिस्कार गर्ने जनाएको थियो ।